Fjölmennt tekur við Miðstöð um auðlesið mál

Merki fyrir Miðstöð um auðlesið mál

Fjölmennt hefur tekið að sér að sjá um rekstur Miðstöðvar um auðlesið mál.
Miðstöðin var áður staðsett hjá Landssamtökunum Þroskahjálp.

Vefsíðan er www.auðlesið.is

Hér er frétt Fjölmenntar:

Snorri Rafn Hallsson hefur verið ráðinn starfsmaður Miðstöðvar um auðlesið mál.

Snorri Rafn lauk meistaranámi í heimspeki frá háskólanum í Kaupmannahöfn árið 2016. Hann hefur starfað sem dagskrárgerðarmaður á Ríkisútvarpinu–Rás 1, verið upptökustjóri og textasmiður.

Starfsemi miðstöðvarinnar er í mótun. Helstu verkefni hennar til að byrja með er vinna fyrir Félags- og vinnumarkaðsráðuneytið við að einfalda texta lagagreina sem varða fatlað fólk.

Mikilvægt verkefni stöðvarinnar er að bregðast við málefnum líðandi stundar og að fólk fái auðlesnar og hlutlausar upplýsingar um það sem er að gerast á hverjum tíma.

Í starfi miðstöðvarinnar er samráð við fatlað fólk mjög mikilvægt til að byggja á þekkingu þeirra sem nýta sér auðlesið mál og læra af þeirra reynslu. Skoða þarf hvernig fólki finnst best að taka á móti upplýsingum og skoða hvernig það notar netið, smáforrit og snjalltæki sér til aðstoðar í daglegu lífi. 

Í framtíðinni mun verða hægt að leita til miðstöðvarinnar til að lesa yfir efni sem þegar hefur verið búið til af starfsfólki hjá hinum ýmsu stofnunum og sveitarfélögum, farið yfir efni, ráðgjöf veitt um framsetningu, texti lagfærður og veitt ráðgjöf um miðlun efnisins.

Við erum mjög spennt yfir þessum tímamótum og bjóðum Snorra Rafn velkominn til starfa.

Smelltu hér til að sjá frétt Fjölmenntar