Desemberuppbót til foreldra langveikra og alvarlega fatlaðra barna

Tryggingastofnun ríkisins greiðir út desemberuppbótina til foreldra langveikra og fatlaðra barna.

Guðmundur Ingi Guðbrandsson, félagsmála- og vinnumarkaðsráðherra, hefur undirritað reglugerð sem kveður á um að foreldrar barna sem eru langveik eða alvarlega fötluð fái greidda desemberuppbót. Óskert desemberuppbót er 64.066 krónur. 

Þetta kemur fram á vef stjórnarráðsins.

Í reglugerðinni segir að foreldri langveiks eða alvarlega fatlaðs barns sem hefur fengið greiðslur í desember 2021, samkvæmt lögum um greiðslur til foreldra langveikra eða alvarlegra fatlaðra barna, eigi rétt á desemberuppbót.

Foreldri sem fengið hefur mánaðarlega greiðslu samkvæmt lögunum alla tólf mánuði ársins fær fulla desemberuppbót.

Foreldri sem fengið hefur greiðslur skemur en tólf mánuði á árinu 2021 á rétt á hlutfallslegri desemberuppbót í samræmi við þann tíma sem það hefur fengið greiðslur.

Desemberuppbótin nemur þó aldrei lægri fjárhæð en 16.016 krónum.

Tryggingastofnun annast greiðslu desemberuppbótar samkvæmt reglugerðinni.